Berriak

Ainara Gomez Pedraza ikasleak BIKAIN CUM LAUDE kalifikazioa lortu zuen Nazioarteko Doktoretza aipamenarekin

---

• Tesi titulua: Analysis and development of new magnetoactive materials

Epaimahaia:

• Lehendakaritza: Modesto T. López López (Universidad de Granada)
• Bokala: Pavel Kuzhir (University of Nice)
• Bokala: Dmitry Borin (Technische Univestät Dresden)
• Bokala: Carmen Rial Tubio (BCMaterials)
• Idazkaritza: Ane Errarte Yarza (Mondragon Unibertsitatea)

Laburpena:

Moldagarritasuna, monitorizazioa eta denbora errealean erantzuteko gaitasuna eskatzen duten sistema aurreratuen eskaera gero eta handiagoak material adimendunen garapena eta ikerketa bultzatu du. Material hauek kanpo estimulu baten aurrean beren propietate fisikoak egokitzeko gai dira. Kategoria horren barruan, material magnetoaktiboak (MA) nabarmentzen dira beren portaera eremu magnetiko bati erantzunez berehala aldatzeko duten gaitasunagatik. Haien ekintza azkarrak, eraginkortasunak eta itzulgarritasunak bereziki erakargarri egiten dituzte erantzun zehatza eta berehalakoa eskatzen duten aplikazioetarako. Hala ere, abantailak izan arren, material horiek erabilera mugatzen duten zenbait eragozpen dituzte oraindik. Hori dela eta, doktore-tesi honen helburua material MA eta karakterizazio sistema berriak garatzea eta aztertzea da, haien propietateak optimizatzeko eta aplikazioa errazteko. Zehazki, tesi hau bi material MA motatan zentratu da: fluido magnetorreologikoak (FMRak) eta elastomero MAak.

FMRei dagokienez, desabantaila nagusietako bat grabitazio-egonkortasun baxua da. Testuinguru horretan, fase solidoak FMRen portaera magnetorreologikoari nola eragiten dion aztertu da, partikulen konposizioa, tamaina eta morfologia bezalako faktoreak kontuan hartuta. Horretarako, partikula mota desberdinak dituzten laginak sintetizatu eta karakterizatu dira, propietate fisiko horien eragina MR erantzunean eta suntsipen-mekanismoetan, baita eremu magnetiko baten esposizioaren ondoren fluidoaren itzulgarritasuna ebaluatzeko.

Gainera, FMRen grabitazio-egonkortasuna ultrasoinuen bidez neurtzeko metodo ez-inbaditzaile berri bat garatu da. Garapen horretan sartzen dira neurketa-sistemaren diseinua eta fabrikazioa, bai eta neurketa-prozesua eta datuen tratamendua ere. Partikulen kontzentrazioaren eta soinuaren hedapen-abiaduraren arteko korrelazioan oinarritzen da metodoa, eta soluzio eraginkor bat eskaintzen du mikro edo nanopartikulaz osatutako fluidoen sedimentazioa neurtzeko.

Bestalde, elastomero MAei dagokienez, erronka nagusietako bat eremu magnetiko baten aurreko deformagarritasuna hobetzea eta materialak eremua kendu ondoren jatorrizko forma berreskuratzeko duen gaitasuna hobetzea da. Tesi honek erronka horiei erantzuten die, magnetikoki bigunak diren partikuletan oinarritutako elastomero MAen generazio berri bat garatuz, deformagarritasuna eta itzulgarritasuna optimizatzeko geruza anitzeko egituraketa espezifiko bat erabiliz.

Materialaren kontrol zehatza lortzeko, 3D digitalizazio-metodo bat erabili da, materialaren deformazioa aplikatutako eremu magnetikoarekin erlazionatzen duena. Gainera, eremu magnetikoak materialaren barne-egiturari nola eragiten dion eta haren deformazioa nola eragiten duen hobeto ulertzeko, propietate magneto-mekanikoen eta magnetikoen ebaluazioa egin da, eta, horren osagarri, mikrotomografia konputarizatuaren bidezko azterketa mikroestrukturala egin da.

Laburbilduz, tesi honek nabarmen laguntzen du material MAen arloan aurreratzen, gaur egun dituzten mugei irtenbide berriak proposatuz. Hala, lortutako emaitzek, material horien portaerari buruzko ezagutza zabaltzeaz gain, material horiek sistema aurreratuetan ezartzea errazten dute, eta teknologia berrien garapena sustatzen dute.